كل ألي حواليا ماسكين حاجة من الثلاثة
قزازة
كباية
أو في العربية ماسكين سيجارة
وأنا واقف في مكان فيه على الأقل 100 بني أدم
وأنا الوحيد ألي ماسك قزازة مية معدنية
الخميس ألي فات
كان يوم كئيب جداً
طلعت حفلة سعاد ماسي في القلعة
لقيت كل الناس دوائر
صحاب مع بعض
وأنا كنت وحدي
نزلت بعد خمس دقائق بالظبط
مستحملتش الوحدة
وكم السعادة ألي كانت حواليا ومش قادر أكون في وسطها
نزلت ومشيت كتير لوحدي في الشارع
منها علشان شارع صلاح سالم واقف
ومنها علشان معنديش حته أروحها أصلاً
جتلي مكالمة من بنوته صاحبتي قاعدة في وسط البلد
نزلتلها الجريون
وكانت قاعدة مع صديقة مشتركة
كل واحدة فيها قدامها القزازة
وواضح إنهم قاعدين من بدري
بمجرد ما قعدت في وسطتهم حسيت أن دمي تقيل مووووووووت
بكلم كلام غير كلامهم
لهجة غير لهجتهم
تون صوت غير تونهم
حاجات غير حاجاتهم
خمس دقائق بالظبط وقمت
وهكذا
دائماً ما تكون القزازة أو الكباية أو سجارة العربية
واقفة في النص بيني وبين الأخرين
للأسف أنا مينفعشي أشرب
وهما لما بقعد معاهم بيكونوا دايماً في وادي
وأنا في وادي
مش عارف حعرف أتجاوز الوادي دوت وأعدي ليهم
ولا لاء
ساعات بسئل نفسي هل دوت ألي أنا عايزه
مش عارف
7 سنين بعيد عن الناس
معرفشي حد
والناس ديت هيه ألي بعرف أختلط بيهم
مش حيكلموني عن أخر محاضرة لعمر خالد
ولا البرنامج الجديد في محطة الناس
ولا الفيلم الجديد بتاع هنيدي أو الأسواء محمد سعد
لو بصيط للناس على إنهم يمين وشمال
وأنا واقف في النص
فحلاقي أن القزازة والكباية والسجارة ألي في العربية
أخف على قلبي
من كل الفروق ألي بيني وبين الناس ألي على اليمين
قزازة وكباية ومية معدنية
Subscribe to:
Post Comments (Atom)
No comments:
Post a Comment