الحواف

الساعة ستة ونص الصبح دلوقتي
منمتش من أمبارح
السهرة بدئت الساعة حداشر بالليل في الكايرو جاز كلاب
وأنتهت ستة الصبح في سطوح أوديون

السهرة كانت جميلة جداً
ضحك، نكت، قفشات، تريقة، رقص، كل حاجة جميلة

لكني طول الوقت كنت على الحواف
ناس كتيرة
وشوش شبه مألوفة
مجرد شبه مألوفة
مفيش أكتر من هاي أزيك تمام
حتى ساعات كتيرة لا أنا ولا الأخر نعرف أسماء بعض

كل الأماكن الناس فيها دوائر
وأنا دايماً على الحواف

الناس ظريفة جداً
بشوشة جداً
مرحبة جداً

لكن الحوار غريب عليا
القفشات بالنسبة ليا مش مفهومة
بيحكوا عن مواقف مشفتهاش
ناس معرفعاش
أماكن مرحتهاش

في الأول والأخر ديت أول أو ثاني مرة أشوف ناس منهم

طلع الصبح عليا وكنت سعيد بثلاث حاجات

شاب كنت مستريحله من فترة أكلم معايا أمبارح في ألي مضايقة
صحيح فاتني الجزء الثالث من عرض بشير
بس كنت سعيد إنه فتحلي قلبه وشاركني بهمه

صاحب فضلت معاه وفضل معايا طول السهرة ولحد الصبح
شفت جانب جديد منه
جانب مكنتش أعرفه عنه
بس عجبني

وأخيراً ناس أنا عجباني صحبتهم
وأحب أبقى في وسطهم
ورغم أني لسه على الحواف
إلا أني لسه مصر أني أدخل في وسط الدايرة