"ك.." أم الدنيا

نظر في عيني وقال
أحنا لازم نتفق الأول إنه حقها
قلتله
أنا ممكن أتسجن بيهم
ممكن أدفعهم ورجلي فوق رقبتي
بس عمري ما حقول إنه حقها
رد علي
ويطلع إيه بقه حقها
رديت عليه
دوت حوار تاني، نكلم فيه عن العرف، الشرع، القانون، العدل
لكن إنك تقولي أني أدفع 150 ألف جنية وإن دوت حق وعدل
أسف دوت لا حق ولا عدل
قالي بس دوت إلتزامك، أنت مضيت
قلتله صوري، غبن، نصب، تسليم أهالي
أنا ساعتها كان مرتبي 70 جنية
معملتش دوت إلا إرضاء لأبوها، بتواطؤ منها، أنا أو هيه أو أبوها حد فينا ساعتها تخيل أني أقدر أدفع خمسين ألف
قالي ولا كان يتخيل إنك تطلق
قلتله لاء لكن كان وارد جدا
وهيه كانت عارفة دوت كويس
بينا مشاكل كتير جداً
وقلتلها نراهن، لربما لما نتلم في بيت واحد الأمور تنصلح
ولو مأنصلحتش فكده كده علاقة أنتهت
تنتهي دلوقتي
تنتهي بعد سنة
علاقة وأنتهت
بس لربما تنجح
ومنجحتش.
فأبقى علشان مش قادر أكمل في العلاقة ديت
تقوليلي أدفع 150 ألف جنية.
قالي يا ...... الكلام دوت مش قابل للتفاوض
أهلها عرفوا، وأنت عارف التاريخ ألي بينك وبين أبوه
من ساعة ما أتخانقت معاه بسبب سوء معاملته لأختها
وأخدت بناته الأثنين عندك غصب عنه.
وهوه دلوقتي مش حيتردد في إنهم يحبسك
ولازم تكون عارف إن ....... مش في إيديها إنها توقف دوت
لإن الموضوع دلوقتي طلع من إيديها خلاص وبقه في إيد أبوها
هيه خلاص إدت الإيصالات لأبوها
والموضوع بقه في إيد أهلها
قلتله ودوت أنا سعيد بيه
في الأخر أنا مقدر إن أهلها كان لازم يعرفوا
وإن أهلها هما ألي يعملوا كده فدوت معناه أن الصراع مع أهلها، مش معاها
وأنا محبش أدخل معاها في صراع
قالي ديت وجهة نظر أهلها ووجهة نظرها كمان
وأنا دلوقتي بكلم بإسمها وبقولك أدفع يا ..... الـ 150 ألف جنية ألي مضيت بيهم الثلاث وصلات أمانة أو حتتحبس
قلتله يحبسوني
أنا لو مش معايا 150 ألف أنا لو معايا 15 ألف أحبسوني بيهم
قالي أنت فاكرني بهرج
قلتله لاء أنا عارف إنك مش بتهرج
بس يا ...... أنا بقولك أدفع 150 ألف جنية حتقولي إيه
قالي معيش وحتحبس بيهم
قلتله أسم الله عليك، ودوت بالظبط ألي أنا بقوله، حتحبس بيهم
قالي يبقى مفيش كلام تاني ممكن نكلم فيه
قلتله يبقى أستئذنكم

هذا الحوار حدث بالفعل أول أمس مع صديق عمري، أخي وتوأم روحي
من كنت أظن أنه من خرجت به من الدنيا
ف.. أم الدنيا